உடலுறுப்பு தானம் உயிர்களை காக்கும்

நம்நாட்டில் ஆண்டிற்கு சராசரியாக 2 லட்சம் பேர் விபத்தில் சிக்கி மூளைச்சாவுக்கு ஆளாகி இறக்கிறார்கள். இவர்களது கிட்னி, இருதயம், நுரையீரல், கல்லீரல் ஆகியவை வீணாக மண்ணுக்கு போகிறது. மண்ணுக்கு வீணாக செல்லும் உறுப்புகளை வாழ காத்திருக்கும் மனிதருக்கு வழங்கினால், தானம் பெறுபவரும் வாழ்வார், தானம் கொடுத்தவரும் மற்றொரு உயிரில் வாழ்வார்.

ஆனால் உடல் உறுப்பு தானம் குறித்த விழிப்புணர்வு இல்லாததால் மூளைச்சாவு ஏற்பட்டவரின் உடல் உறுப்புகள் தானமாக வழங்கப்படாமல் வீணாகிறது. மூளை சாவு ஏற்பட்டவரின் உடல் உறுப்புகளை தானமாக வழங்க உறவினர்கள் முன் வர வேண்டும். உடல் உறுப்பு தானம் வழங்க வயது ஒரு தடையில்லை.

விபத்தில் சிக்கி மூளை சாவு ஏற்பட்டவரின் இதயம் துடித்து கொண்டிருக்கும். ரத்த அழுத்தம் குறைந்து வரும். அப்படியே விட்டால் 2 அல்லது 3 நாளில் தானாக உடலின் அனைத்து உறுப்புகளும் செயலிழந்து உடல் இறந்து விடும். அதற்குள் மூளைச்சாவு ஏற்பட்டதை உறுதி செய்ய 10 முதல் 15 வகையான பரிசோதனை உள்ளது. அதன் மூலம் உறுதி செய்த பின்னர், மருத்துவர் குழு உறவினர்களுக்கு அறிவிக்கும். உடனடியாக உறவினர்கள் மூளைச்சாவு ஏற்பட்டவரின் உறுப்புகளை தானமாக வழங்க முன்வந்தால் டாக்டர்கள் உடனடியாக அரசின் நல்வாழ்வுத்துறையில் பதிவு செய்வார்கள்.

இதற்கிடையில் உடல் உறுப்புகளை ஆரோக்கியமான நிலையில் அகற்ற போதுமான பராமரிப்புகளை கையாண்டு, அதை உயிர் நிலையில் வைத்திருப்பார்கள். பின்னர் உறுப்புகளை அகற்றி பதிவு செய்தவர்களுக்கு முன்னுரிமை அடிப்படையில் பொருத்த ஏற்பாடு செய்வார்கள். இதனால், பலரது உயிர்களை காக்க முடியும்.