ஏழைக்கு அரசு ஊழியர் வேலை கிடைக்க உதவிய காமராஜர்

ஏழைக்கு அரசு ஊழியர் வேலை கிடைக்க உதவிய காமராஜர்

******************************************************************

காமராஜர் தமிழ்நாட்டின் முதல்-அமைச்சராக இருந்த நேரம். தனது அதிகாரிகளுடன் சுற்றுப்பயணம் மேற்கொண்டிருக்கிறார்.

திரளான மக்கள் கூட்டத்திலும் சுலபமாக நெருங்க முடிந்த ஏழை மனிதர் ஒருவர், ``அய்யா எனக்கு ஏதாவது வேலை போட்டுக் கொடுங்க...'' என்று கையேந்துகிறார்.

அதிகாரிகள் அவசர கதியில் அவரை விசாரிக்கும் போது அவர் படிக்காதவர், பரம ஏழை என்று புலனாகிறது.
அந்த ஏழை மனிதருக்கு ஏதாவது அரசாங்க வேலை போட்டுத்தர முதல்-அமைச்சர் காமராஜர் விரும்பினார்.

அதுபற்றி அதிகாரிகளுடன் கலந்தாலோசித்த போது, ``படிக்காதவர், அதோடு அரசாங்க வேலை பார்க்கும் வயதுக்கான வரம்பையும் தாண்டியவர்'' என்று விளங்கிய அதிகாரிகள், ``சட்டரீதியாக அரசு வேலை கிடைக்க (கொடுக்க) வாய்ப்பில்லை'' என்பதையும் தெளிவுபடுத்தினார்கள்.

உடனே சட்டென முகம் வாடிப்போனது முதல்-அமைச்சருக்கு. ஆனாலும் தனது வேதனையை அதிகாரிகளிடம் கேள்வியாக்கினார். ``இல்லாத ஒரு ஏழைக்கு ஒரு வேலை கொடுத்து உதவ மாநிலத்தின் முதல்-அமைச்சருக்கே கூட அதிகாரம் இல்லாமல் ஒரு சட்டமா?''

முதல்-அமைச்சரின் இந்த வருத்தமான கேள்விக்கு உடனே தலைமை நிர்வாகி இப்படிப் பதில் சொன்னார். ``ஆனாலும் பொதுநலன் கருதி முதல்-அமைச்சர் தனது சுயசிந்தை மூலம் அச்சட்டத்தை மீற அச்சட்டமே இடம் கொடுக்கிறது''.

முதல்-அமைச்சர் முகத்தில் வருத்தம் மறைந்தது. ``ஒரு ஏழைக்கு உதவறதுன்னா என்ன? பொது நலன்னா என்ன? ரெண்டும் ஒண்ணுதானே.

இவருக்கு வாட்ச்மேன் வேலை போட்டு ஆர்டரை அடிச்சிட்டு வாங்க. நான் கையெழுத்துப் போடறேன்'' என்றார் மகிழ்ச்சி முகமாய்.
அதன்படியே அந்த ஏழைக்கு அரசு ஊழியர் வேலை கிடைத்தது.